(Madda Oduu ABO/MOA/Adoolessa 8,2009) Maddeen keenya magaalaa Finfinnee irraa akka gabaasanitti mootummaan Wayyaanee duula Oromoo fi Oromummaa irratti gaggeessu itti fufuudhaan, ilmaan Oromoo ji’oota sadan darbaniif aadaa fi seenaa saba Oromoo barataa turanii Waxabajjii 28,2009 eebbaaf qophaawan waraana isaa itti bobbaasee facaasee jira.
Barattoonni lakkoofsaan 280 gahan kunniin magaalota Finfinnee, Amboo, Walisoo, Salaalee, Adaamaa fi baadiyyoota Oromiyaa biroo irraa kan walitti qabaman si’a tahu, torbaan torbaaniin geejjiba baasanii magaalaa Finfinneetti deddeebi’uun barnoota isaanii hordofaa turan.
Waldaa walgargaarsaa fi misoomaa Maccaa- Tuulamaatti dameen aadaa fi seenaa dargaggoota muraasaa sagantaa barnootaa kana kan calqabsiise, mana dhuunfaa kireeffatee si’a tahu, lakkoofsi dargaggoota barnoota kanaan hawwamanii dabalaa dhufuu irraa bakki waan hanqateef, dargaggoonni maallaqa walitti busuun sharaa bitanii gaaddisa jalatti barataa akka turan odeessi nu gahe ni mirkaneessa.
Gabaasaan maddeen keenyaa dabaluun akka addeessuutti guyyaa eebbaa kana maatiin barattootaa fi ummanni kumaan lakkaawamu magaalotaa fi baadiyyoota Oromiyaa irraa huccuu aadaa Oromootiin faayamanii argamanis waraana Wayyaaneen facaafamanii gaddaan gara dhufanitti deebi’an.
Kanumaan wal qabatee waajjira WMT tti namoonni sadii ol akka hin argamne Wayyaaneen akeekkachisi kennamee jira. Prezdaantiin Waldichaa Obbo Dirribii Damisee guyyuu bilbilaan doorsifamaa akka oolan gabaasaa nu gahe irraa beekuun danda’ameera.
Gochaan kun yakka saba Oromoo fi Oromummaa irratti diinaan raawwatamaa jiru waan taheef, ummanni Oromoo bakka jiru maraa gochaa abaaramaa kana akka baleeleffatuu qabu sab-boontoonni Oromoo dhaamaniiru. Tarkaanfiin mootummaa wayyaanee kun sirnichi amma illee WMT irraa harka isaa hin kaasin jiraachuu kan agarsiisuu dha.
MOA |
